На првите страници од списанието се објавени текстовите „Востоличување на македонските автори на светската книжевна мапа“ од Јовица Тасевски-Етернијан и „Чудесна шестјазична светска премиера на македонската литература“ од Бранко Цветкоски за капиталниот издавачки проект „Превод на антологии на македонската книжевност на шест странски јазици“. 

Поетот и критичар Санде Стојчевски ги претставува најзначајните нови поетски книги, а романсиерот Блаже Миневски има приредено колаж од куси прикази на најинтересните романи објавени на македонски јазик во 2016 година. Проф. д-р Фатмир Сулејмани се осврнува на современата албанска книжевност, а во списанието е претставена и книгата од авторите Назли Рана и Зеки Ѓурел од Турција посветена на творештвото на писателот Илхами Емин. 

Исто така во првиот број е објавен освртот на проф. д-р Ѓоко Ѓорѓевски за прозната книга од рускиот епископ Тихон Шевкунов, чиј превод, издавање и промоција предизвикаа голем интерес кај македонската читателска јавност. 

Специјален гостин во првиот број на списанието е познатата естрадна уметничка Викторија Лоба, која се појавува на насловната страница, а во рубриката „За книгата со љубов“ читателите можат да го прочитаат нејзиното искажување за тоа какво значење има книгата во нејзиниот живот, колку и зошто ги сака книгите, кои книги ѝ оставиле посебен впечаток и зошто смета дека е важно да се чита. 

Владимир Илиевски пишува за придонесот што во македонскиот книжевен растеж го има дадено списанието за литература, уметност и култура „Современост“, кое минатата година одбележа 65 години од излегувањето на првиот број, а исто така тој е автор и на освртите за стручната книга за македонските кодики од 19 век од д-р Михајло Георгиевски и за новиот Правопис на македонскиот јазик што го објави Институтот за македонски јазик „Крсте Мисирков“. 

За Светскиот ден на книгата и авторското право и за македонскиот штанд на Саемот на книгата во Париз се осврнува Елена Никодиновска, а за презентирањето на македонската книжевност и издаваштво на Меѓународниот саем на книгата во Пекинг пишува Јовица Тасевски-Етернијан. 

Викторија Костоска ги претставува манифестациите „Ден на читателот“ и „Денови на светската книжевност“ што ги организира НУБ „Св. Климент Охридски“ со цел да се поттикне и развие културата на читање. 

Томислав Каранфиловски се осврнува на неколку стручни книги, како што се терминолошкиот речник од областа на градежништвото што го објави МАНУ, книгата „Почетоци на западната философија – претсократовци“ од акад. Витомир Митевски, „Културна антропологија“ од проф. д-р Илија Ацески и книгата „Велика Британија и Балканот“ од д-р Теон Џинго, а тој е автор и на објавениот прилог за најбараните македонски публикации во странските библиотеки. 

Во првиот број на списанието читателите можат да прочитаат и дел од промотивниот говор на д-р Филип Петровски за едицијата „Црните страници на УДБА“ во издание на Државниот архив на Република Македонија. 

„Книга за одгатнување на тајните на бесконечното множество од публикации“ е насловот на освртот на проф. д-р Димитар Пандев за „Прирачникот за универзална децимална класификација“ од Сенка Наумовска. Во завршниот дел од текстот авторот истакнува: „Во македонската култура во сферата на издаваштвото се случуваат настани од историско и епохално значење. Зад нив стои македонската држава и нација, македонската литература и култура, македонската наука и уметност, зад нив стојат македонските издавачи и македонските библиотеки. Тоа се вредности кои ниту смеат ниту пак можат да останат затворени во тесен круг, неопходна е нивна афирмација во светот на информациите“. 

На крајот на првиот број на списанието „Издаваштво“ е објавен Конкурсот за странски издавачи на Министерството за култура за финансирање преводи на репрезентативни и квалитетни дела од македонската книжевност на странски јазици. 

Списанието „Издаваштво“ излегува во печатена форма и се објавува на интернет-страната на НУБ „Св. Климент Охридски“ – Скопје. Главен уредник е Јовица Тасевски-Етернијан, одговорен уредник е м-р Владимир Илиевски, а членови на редакцијата се Магдица Шамбевска, Викторија Костоска, Блаже Миневски, Милош Линдро и м-р Томислав Каранфиловски. Фотографиите се на Драган Кумев и Маја Мицевска, а графичкиот дизајн и компјутерската обработка е на Јован Стојановски. 

Списанието се печати со финансиска поддршка на Министерството за култура. 

Првиот број на „Издаваштво“ можете да го прочитате на овој линк.