Предавањето на д-р Балнат е прилагодено за пошироката публика без филозофски предзнаења, но со познавања на германскиот јазик. Таа предавањето ќе го дополни со објасувања на македонски, а ќе одговара и на прашања од присутните.
Централно место во предавањето ќе има дијалогот односно разговорот:
- Што значи „да се разговара со некого за нешто“?
- Под кои услови може воопшто да се разговара?
- На што треба да се внимава кога се наоѓаме во разговор?
- Дали можеме разговорот произволно да го насочуваме или сме во одредена смисла самите ограничени од него?
- До кој степен можеме да го владееме разговорот без да го повредиме достоинството на соговорникот, т.е. неговата другост?
- Дали постојаното практикување разговор претставува практикување општественост, т.е. граѓанскост?
Д-р Силвана Балнат го напиша следново:
Неколку аспекта се неодминливи за еден разговор. Тие не се само својства на еден успешен или добар разговор, туку се нужни за воопшто разговорот да се случи. Овие аспекти се: отвореност на соговорниците еден за друг, заемно признание како и една т.н. предструктура на разговорот (мотивација, предзнаења и цели), која ја носиме со себе и ја вложуваме во секој разговор што го водиме. Овие својства не го опишуваат само веќе постоечкиот разговор, туку претставуваат услови за можноста на секој разговор.
Целта на оваа средба е да се испита тезата за отвореноста, заемното признание и за предструктурата како услови за можноста на разговорот, како и нејзините практични последици за нас и за нашиот однос кон соговорниците или воопшто спрема нашите солуѓе. Овие прашања се од длабоко значење за секое граѓанско општество но се недоволно рефлектирани практикувани во нашето општество. Да се живее во едно граѓанско општество значи во една многу важна смисла да се има соодветно „држење“ спрема сограѓаните, на кои и тоа на секој од нив посебно им се признава човечкото достоинство. Ова значи дека секој граѓанин може и треба да биде не само граѓанин, туку и сограѓанин, не само говорник или слушател, туку и соговорник и сослушател. Овие моменти го претвораат разговорот во суштинска димензија за споменатото граѓанско „држење“ во едно општество.
На 25.04.2013 Силвана Балнат ќе одржи работилница наменета за студентите од Катедрата за германски јазик и книженост на Филолошкиот факултет „Блаже Конески“.