Обраќање, по повод одбележувањето на Де Сервантес и Шекспир, имаа амбасадорот на Шпанија во Македонија, Рамон Абароа Каранса и амбасадорот на Велика Британија во Македонија, Чарлс Гарет.
Љупчо Тодоровски-Упа ја изведе „Служба за свети Климент Охридски“, а фрагменти од делата на Шекспир и Де Сервантес насловени како „Ѕирни во ковчежињата на фикцијата“ изведоа студентите од Катедрата за англиски јазик и книжевност и групата за шпански јазик и книжевност од Катедрата за романска филологија при Филолошкиот факултет „Блаже Конески“ - Скопје.
По повод светскиот ден на книгата се прочита и пораката на Ирина Бокова, генерален директор на УНЕСКО, а македонската порака ја упати драмскиот писател и режисер Љубиша Георгиевски. Традиционално се делеа книги и рози на сите присутни, љубители на пишаниот збор.
Предавање на тема „Политиката и владеењето во животот и делото на Мигел де Сервантес“ одржа д-р Карлос Флорес Хубериас, професор по компаративно право на Универзитетот во Валенсија и почесен доктор на науки на Универзитетот „Св. Кирил и Методиј“ - Скопје.
Беше прикажан и анимираниот филм за деца „Donkey Xote“, а во музичкиот дел од чествувањето настапија студентите по гитара и соло-пеење од Факултетот за музичка уметност.