На свеченото отворање на изложбата свое обраќање ќе имаат директорите на Националните библиотеки и помошникот министер за култура на Р. Хрватска, г. Владимир Стојсављевиќ, додека изложбата ќе ја прогласи за отворена г. Мачеј Анджеј Качоровски, советник во амбасадата на Р. Македонија во Р. Хрватска. Македонските писатели Лидија Димковска, Блаже Миневски и Владимир Илиевски ќе читаат извадоци од свои познати дела на македонски јазик со превод на хрватски јазик, а следниот ден ќе учествуваат на трибината за преводот, чиј координатор ќе биде проф. д-р Борислав Павловски. Најавено е учество на повеќе издавачи, книжевни агенти и писатели од Хрватска, меѓу кои Ивица Баковиќ, Маја Мастнар-Цар и други, при што тие ќе бидат информирани за отворениот конкурс за поддршка на превод на македонски дела на други јазици, како и за деталите во врска со апликацијата и конкурирање за средства за поддршка на преводот на релевантни македонски дела на хрватски јазик.
По претставувањето на хрватската книжевност во Скопје во 2014, ова е возвратна манифестација за претставување на македонската книжевност во Хрватска која сметаме дека ќе иницира поинтензивна соработка за меѓусебно приближување и запознавање на книжевностите на соседните земји.
Следната година овој проект продолжува со реципрочна соработка со бугарската Национална библиотека, а потоа и со словенечката, црногорската, босанската, романската итн. Основната идеја на овој концепт е дека со конкретна комуникација меѓу книжевностите на земјите од Југоисточна Европа не само што ќе се потврди и поддржи потребата за меѓусебно приближување, размена и превод на врвни книжевни дела туку ќе се отворат и нови можности за уште поголема културна комуникација на народите од овој дел на Европа.
ПОКАНА ЗА ПРИСУСТВО http://www.nsk.hr